وصفة ناجحة لتحضير دجاج العراسات

الأربعاء 16 نوفمبر 2016
أخر تحديث : الأربعاء 16 نوفمبر 2016 - 10:08 مساءً

المقادير :

4 دجاجات كل ماكانو صغار كيكونو ألذ ونحاولو يكونو في نفس الوزن تقريبا + 8 حبات بصل كبيرة + ربيطة متوسطة

معدنوس + 1 راس كبير ثوم + م ص سمن حار + م ص قرفة + قرفة عواد + م ص معمراش كامون + م ص إبزار + م ص عامرة سكنجبير + نصف م ص خرقوم + 5 زعفرنات + شوية زعفران شعرة أنا ماعملتوش + م ص ملح + 4 حبات قعقلة أو الهيل + 4 حبات نويويرة + كاس زيت بلدية وكاس زيت رومية + ربع حامضة مصيرة كبيرة

للتدغميرة :

الكبادي د الدجاج + زلافة زيتون اخضر مقطع + حامضة مصيرة

للتزيين :
التمر + عقدة اللوز + اللوز مقلي او بلاش

الطريقة :

طحنت المعدنوس والثوم وو3 حبات بصل وضفتهم على الزيت والتوابل

خلطت الشرمولة وشرملت بيها الدجاج وثقبتو مزيان باش يتشرب الشرمولة وطبعا دخلتها بين الجلد واللحم وفي كل الفراغات

إدا كان عندنا الوقت كل ما خليناه مرقد يكون أحسن مثلا من الليل للصباح او من الصباح لليل الشرمولة كتساعد باش الدجاج يكون فتي وكيطيب أسرع

عملتو يتشحر شوية من زوج جيهات

منبعد ضفت البصلة لي بقات كاملة وضفت 2 ليتر من الماء وغطيت الطنجرة وخصها تبقى معرية من وحد الجهة

ملي كان الدجاج كيطيب سلقت الزيتون وقشور الحامضة وحد عشرة دقايق هاد العملية كتقلل من الملوحة ديالهم وسلقت حتى الكبدة نفس الوقت باش كتحيد منها الزفورية ومنين كنقطعها كتبقا قابطة راسها ومكتفتتش

بعد ما طاب الدجاج حيدتو من الطنجرة وخليتو ينشف ويبرد

وضفت الكبدة بعد ما قطعتها والحامض والزيتون للمرق وخليتو يختر ويعقاد

قليت الدجاج في حمام زيت وضفت فالزيت م ص سمن حار كيعطي ريحة مزيونة فالدجاج ومكيجيش باين الطعم ديالو

بالصحة والراحة حبيباتي نتمنى تجربوه وتستافدو

B

اتـرك تـعـلـيـق 0 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة موقعي

لا تنسوا صالح دعائكن بظهر الغيب لصاحبة الوصفة على المجهود

رابط مختصر