العناية بالأيادي و الأظافر بالتفاصيل.. لا تفوتووووو فرصة الاستفادة

الإثنين 14 يناير 2013
أخر تحديث : الإثنين 14 يناير 2013 - 4:45 مساءً

السلام عليكم و رحمة االله
كيف حالكن؟ نتمنى تكونو على خير

الموضوع لي غادي نتكلم فيه باين من عنوانو، غادي نشوفو مع بعض طرق العناية و الاهتمام بالأيدي
طبعا كلنا كانبغيو بشرة صافية و نقيقية و خالية من العيوب، و لكن غالبا كنهملو الأيادي ديالنا لي هما الدليل على أنوثة السيدة و عنايتها بنفسها
في هاد الموضوع غادي نبين أهم الطرق للحماية و العناية بالأيادي و الأظافر في نفس الوقت
اييوة بغيتي يديدات بحال هادو؟

يللاه نبداو على بركة الله

أولا و قبل كل شيئ صحة كل جزء من الجسم ديالنا سوا البشرة ولا الشعر ولا الاظافر كاتبدا بتغذية جيدة و متوازنة، يعني مايمكنش نبداو بالعناية و الخلطات و الأساس ماشي صحيح.. ثانيا اذا كانوا الأظافر كايعانيو من مشاكل بحال التعفن و لا الطفيليات أو غيرو لازم زيارة طبيب الجلد لأنه القادر على فحص المشكل باش يعطي الدوا المناسب يعني من الأحسن بلا وصفات و خلطات تقليدية لي ممكن تزيد الأمر سوءا.. و واحد الاشارة أخرى ، مهمة واخا النسبة ديالهم ضعيفة مقارنة مع الرجال و لكن تا العيالات ولاو كيدخنوا مؤخرا بزاف و هادشي بالاضافة أنه من المحرمات و أنه يهلك صحة الانسان ففي الجانب الجمالي كيأثر بزاااف على اليدين و الأظافر، الأصابع تايوليو صوفر و الأظافر مطبعين و عاد الرائحة الكريهة لي كتلصق فيهم يعني ضروووووووري الاقلاع عن التدخين !!

مزياااااااان
دابا الحمد لله يدينا و الأظافر ديالنا في صحة جيدة، كيفاش نعتانيو بيهم ؟؟

أول خطوة في العناية هي الوقاية، وهاد الخطوة كاتكون يومية يعني منين نديرو شغال الدار من تجفاف و غسيل الماعن ضرووووري و مؤكد نلبسو قفازات البلاستيك باش نحميو يدينا من أضرار الماء و مواد التنظيف و المساحيق و جافيل الخ… لي هوما السبب الأول فجفاف اليدين و تكسر الأظافر، القاعدة الثانية هي الترطيييب، اليدين كايتعرضو في النهار للماء بزااف في غسيل اليدين و الوضوء … و الماء كيتسبب فجفاف اليدين لذلك كل ليلة قبل النوم لاازم نقومو بوضع كريم مرطب لليدين و نقومو بتدليك بحركات دائرية و مانساوش الأصابع و الأظافر تاهوما. و نعسو مباشرة باش نضمنو أننا مانعرضو يدينا لتا شي حاجة، و واحد الفكرة صغييرة astuce الا بغيتي نتائج أفضل من الأحسن من بعد الكريم تلبسي قفازات في يديك باش يتغلغل الكريم فيهم مزياااان و في الصباح اليدين كايوليو حرييييير

بالنسبة للأظافر ممكن نعتانيو بيهم عبر الطريقة الأتية
كاناخدو اناء و نديرو فيه شوية ماء دافئ و نزيدو عليه العناصر التالية

عصير نصف حامضة من المميزات ديال الحامض أنه ينظف و يبيض أطراف الأظافر
ملعقة كبير زيت الزيتون من أجل تغذية و ترطيب الأظافر
ملعقة كبيرة زيت الخروع لي معروفة أنها كاتقوي الظفر و كاتساعد على تطويله
كانوضعو أصابعنا فالخليط من 10 الى 15 دقيقة مع الحرص على تدليك كا ظفر على حدة باش يستافد من هاد المكونات
ممكن الا سالينا نزيدو شوية سنيدة و لا الملحة و نقومو بتقشير لليد كاملة بطريقة دائرية طبعا و في الأخير نغسلو يدينا و نعملو الكريم المرطب.

باراكا ليوم، غادي نكمل ان شاء الله مع العناية الأسبوعية أو المانكير و كيفية الحصول على أيادي و أظافر جمييييلة
الى الحلقة القادمة بحول الله هههه

اللهم صل و سلم و بارك على سيدنا محمد

نبداو التتمة على بركة الله
كيما الوجه خاصو عناية أسبوعية اليدين كذلك، غادي نوريكم ان شاء الله الطريقة المتعارف عليها للعناية بيهم
غادي نبدا بالأظافر لأن جمال اليدين كايبدا بيهم، و غادي نشرح العناية ديالهم بخطوات
قبل مانبداو العناية كنذكركم بأن اليدين خاصهم يكونو نقيين يعني مغسولين بالماء و الصابون و لا بالغسول المعقم، و بالنسبة للماتريال (اللوازم) راه موجودين عند مالين الماكياج

*الخطوة الأولى كنمسحو الأظافر بالديسولفان سوا كانت فيهم الصباغة أو ماكانتش، حاولو تختارو شي ديسولفان لطيف على الظفر و لي ماكايتسببش في الجفاف ديالهم

*الخطوة الثانية كاناخدو الشيتة و يلا ماكانتش متوفرو ممكن نعوضوها بشيتة ديال الأسنان نظيفة
هاهي الصورة ديال الشيتة

كاناخدو الشيتة و كانفزكوها بالماء و ندوزوها فشي صابونة، من الأحسن تكون هاد الصابونة ماكاتنشفش اليدين يعني مثلا شي صابونة ديال زيت أركان و لا زيت اللوز، و من بعد نحكو الأظافر بهاد الشيتة بطريقة دائرية باش نظفو السطح ديالهم مزيان، منين نساليو نغسلو يدينا و نشفوهم مزياان

*الخطوة الثالثة غادي نقطعو الأظافر ديالنا الا كانو طوال بزااف و نحاولو أن الطول ديالهم يكون متساوي، من بعد نشدو المبرد ديال الكارطووووووون حاولو تتفتداو ديال الحديد راه كايخرج على الظفار، ودابا الحمد لله راه رخاص ماعقلتش واقيلا بشي 5 دراهم تاتشري ميكة فيها شي 10 ديال المبارد (مابقيتش عاقلة الصراحة شريتهم شحال هادي لي عاقلة تذكرني)
و نقادو السطح ديال الظفار بالمبرد و الطريقة الصحيحة هي تمشي في اتجاه واحد ماشي تبقاي غادة جاية بالمبرد حيت هاد الطريقه كاتخرج تاهي علة الحافة ديال الظفر، واييياااكم يكونو ظفاركم فازكين و لا تقادوهم من مور االحمام حيت كايكونو رطبين خاصهم يكونو ناااشفين مزيان و ايلا غادي يتكسرو. من بعد ناخدو البوليسوار هاهي الصورة ديالو

هاد البوليسوار كايصقل الظفر من الفوق و كايزول الأوساخ لي بقات لاصقة و كيردو كايلمع

*الخطوة الرابعة غادي نشدو واحد الاناء فيه الماء دافي و الصابون، أنا كانفضل من الأحسن ديرو الشامبوان حيت ماكاينشفش الظفر، و غادي ديرو صبيعاتكم فيه واحد 10 دقائق تقريبا، بهاد الطريقة الجليدة لي في الظفر كاترطاب و ممكن ندفعوها بالشوية

*الخطوة الخامسة كانشدو هاد العويد من الأحسن يكون سوا ديال الخشب ولا ديال البلاستيك و ندفعو غير بالشوية الجلدة لي كاتكون في الظفر، وياااااكم تقطعوها راه نتوما تقطعوها و هي تزيد تنوض و تخلف وحدة خشينة، ايلا مارطابتش شي جليدة وبقات قاصحة دهنوها واحد الشوية بزيت اللوز عاد دفعوها

*الخطوة السادسة تنظيف الظفر من الداخل من الأوساخ بشي عويد و غير بشوية

*الخطوة السابعة خودو شوية ديال أي زيت اللوز أو الزيتون أو الخروع أو ديرو نقيطو واحدة فكل ظفر و ديرو ليه مساج باش يتغدا و يترطب من بعد ديرو الكريم المرطب على اليد كااملة و من الأحسن ديرو ليه مساج باش يتغلغل مزياااان في الجلد

*الخطوة الثامنة الصباغة
قبل مانتكلم على الخطوة أنا لا أدعو للتبرج و الخروج للشارع بالصباغة بأشكال و ألوان و أذكر بأن الوضوء باااطل اذا كانت الصباغة في الظفار أنا أبرء ذمتي، و مرحبا باللي بغات تديرها فدارها و في أيام الدورة الشهرية
قبل ماتوضعي الصباغة ضروري لاباز هي الأولى باش تحمي الظفر من التلون عاد كانوضعو الصباغة، والوضع ديالها يتم من الداخل لبرا و بثلاث خطوات نديرو الوسط من بعد الجناب الي بقاو، الا بغيتو تزيدو هادي كاينة واحد الصباغة شفافة لي كادار من مور الصباغة باش تحميها من التقشر.

بهادا موضوعي سالا نتمنا تكونو ستافدتو شوية
أسألكم الدعاء

رابط مختصر