جديد !! تحضير كيكة الكوكوط (طنجرة الضغط)

السبت 17 أكتوبر 2015
أخر تحديث : السبت 17 أكتوبر 2015 - 6:47 مساءً

كيكة الكوكوط

المقادير:
4 بيضات
2 خميرات الحلوى
1 لاباني
6 معالق كبار عامرين مزيان دقيق /فورص/
2 معالق كبار عامرين مزيان كاوبيل/ ممكن نستعملو بودرة الكاكاو فبلاصة كاوبيل
كاس صغير سنيدة
كاس زيت /كاس صغيرو ادا كان ديال العنبة كاس الا ربع باش ما تجيش الكيكة مزيتة
كوكوط و زبدة باش ندهنوها و شوية الطحين باش نرشوه
دابا ندوزو للطريقة
ندهنو الكوكوط بالزبدة و نرشوها بالطحين و نحطوها جانبا
في اناء نديرو البيض و السنيدة و لاباني و نخلطوهم مزيان حتى تدوب سنيدة
و نزيدو الزيت و نخلطو مزيان
عاد نزيدو الطحين و كاوبيل و الخميرة و نحركو حتى يتجانس الخليط
نكبوه فالكوكوط و نسدوها و ما نديروش الصفارة
نديروها فوق البوطة على نار مهيلة بزاف يعني ننقصو البوطة على حدها
نخليوها من 20 حتال 30 دقيقة تقريبا على حسب البوطة كاين لي واخا كتنقصها مزيان كتبقى مجهدة شوية
المهم منين نشوفو دخان ابيض خرج من بلاصة الصفارة نعرفوها طابت و نطفيو عليها
ادا بغينا الكيكة تجينا متقوبة من الوسط بحال ديال المول ناخدو قرعة الكونفيتير و ندهنوها بالزبدة و نرشوها بالطحين و نحطوها فوسط الكوكوط عاد نكبو الخليط
القرعة راها ما كاتتهرسش
بعد المرات كنلقاوها تحرقات شوية من لتحت ماشي مشكل نكرطوها بشوية بالموس
ندوزو للشكل الاول
لتزين:

نصف لتر حليب
2 معالق كبار عامرين مزيان كريم باتيسيير
2 معالق كبار سنيدة
2 شكلاطات
نقسمو الكيك على جوج
فكاسرونة نديرو الحليب ونضيفو ليه السنيدة و الكريم باتيسيير عاد نديروه فوق البوطة يتغلى و نبقاو كنحركو حتى يغلى و يختار
بحال ادا كانصاوبو لفلان منين يغلى نطفيو عليه
نديرو شوية وسط الكيكة
و نرجعو النصف الفوقاني
و نكبوالباقي فوق الكيكة و نحاولو نزلوه شوية من الجناب
نحكو الشكلاط فوق الكيكة و نمسحو جناب الطبسيل و ندخلوها للثلاجة حتى تبرد

1

2

3

4

5

6

7

8

اتـرك تـعـلـيـق 4 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة موقعي

لا تنسوا صالح دعائكن بظهر الغيب لصاحبة الوصفة على المجهود

رابط مختصر