كتعاني من كلف من تجربتي شخصية لقيت الحل بعد أربع سنوات عداب

الثلاثاء 23 سبتمبر 2014
أخر تحديث : الثلاثاء 23 سبتمبر 2014 - 6:34 مساءً

السلام عليكم حبيباتي في الله انا دائما كنستفد منكم و من الوصفات ديالكم و لكن اليوم بغيت نعطيكم وصفة من تجربتي الخاصة اولا نعاود ليكم شوية على تجربتي لخايبة مع كلف لي خرج ليا فوجهي و شوهو لي مع العلم ان بشرتي بيضاء واحد نهار دوشت و حكيت و جهي بالكيس بزاف و خرجت لشمس سخونة و رجع لي وجهي احمر من بعد ولاولي بقع سمراء فوق نيفي و خدودي وليت كنحشم نخرج واخة ندير فوندوتان كيبانو البقع جربت شيرلي ايديال ولكن غير كنقطعهم تيرجع و جهي كيف كان و كتر و ملي عرفت لخطورة ديالهم ماعاودتش درتهم ايوا قلت نمشي لصيدلية نجرب حظي عطاني كليرمين حتى هي مادارتلي والو واحد لمرة مشينا لمراكش و بان ليا واحد خبير اعشاب بشهادة ديالو زعما و معلقها قلت صافي هنا نلقا دوايا ملي قلت ليه بغيت دواء لهاد كلف لي فوجهي قال ليا مرحبا فرحت و قالي واش هاد الكنف قديم قلتلو عامين دابا و هو فيا قال غير سيري ا ختي ماعندو دوا حيت قديم فيك بزاف عرفتو شنو صافي تصدمت قلت ياربي انا مازال متزوجت ما ولدت و الوجه ديالي رجع بحال الى عندي توام مرضت بزاف و لي كيزيدني هو لهضرة دوال ناس أويلي مال وجهك كان غزال علاش رجع هاكا ايوا دازت عليا لمدة 4 سنوات بقيت كنقلب و نبحث و خترعت هاد الوصفة لي هناتني من معاناتي و ختي مسكينة والدا 4 تباركلا و فيها كلف قديم و جربتها ليها و بدا كيحيد الحمد لله للعلم انا بشرتي دهنية شوية و اختي بشرتها جافة نبداو بسم الله
ملعقة صغيرة مسحوق الحمص
ملعقة صغيرة مسحوق الفول
رأس ملعقة صغيرة غاسول ابيض
رأس ملعقة صغيرة مايزينا
كنغسلو وجهنا بماء دافئ ضروري يكون دافئ باش يفتحلنا المسام و بصابون طاوس او اي صابون مخصصاه لوجهك نخلطو لماسك حتى هو بماء دافئ و نديروه لوجهنا مدة ساعة ملي يبدا ينشف نحاولو مانتكلموش حيت لوجه تايبدا يتجبد ملي دوز ساعة نغسلو بماء بارد فلول غير نرشو الوجه مزيان باش يرطاب ثم نبداو نغسلو عادي ملي تبغي تنعسي دهني وجهك بزيت اركان او اي كريم مرطب كتستعمليه فليل
عافاكم لي دخلات تدعي معايا بتيسير اموري احبكم في الله و سمحولي طولت عليكم

اتـرك تـعـلـيـق 10 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة موقعي

لا تنسوا صالح دعائكن بظهر الغيب لصاحبة الوصفة على المجهود

رابط مختصر