نصائح للمتزوجات للحفاظ على الزوج

الخميس 26 سبتمبر 2013
أخر تحديث : الجمعة 27 سبتمبر 2013 - 3:55 مساءً

اليوم جبت لكم أسرار سعادتي الزوجية بعدما شفت العديد من السيدات كيرتكبوا بعض الأخطاء اللي غادي نذكرها و تتكون هي السبب فالمشاكل و المشادات اليومية مع أزواجنا
أول حاجة نهدروا عليها هي العطسة , نعم كاين شي عيالات مكيعرفوش يعطسوا بأنوثة و رقة كيديروا شي عطسات خايبين مكتحس بيها حتى كتطلق آآآآآآآآآآآتشو , مالنا أختي على هاد العطسة حتى خلعتي داك الراجل عندك مسكين مللي تجيك العطسة جلسة مستقيمة و ظهرك مفرود و رجل على رجل و دوري وجهك لديك الجيه و قوليه ” آه ” صافي هادي خاصها تكون هي العطسة ديالك الرسمية تدربي عليها , ماشي شغلي أنا فيك الرواح فيك الحساسية فيك انفلونزا الفيلة المهم تحافظي على أنوثتك بأي وسيلة
ثانيا الطواليط بغيت نفهم أنا هاد المراة اللي تكون جالسة حدا راجلها و شوية تنوض و تدخل الطواليط آشنو هادشي آوعدي , واش مكتخافش هاد المراة يبقى الراجل يتخيل فيها جالسة كتقضي حاجتها و تضيع منها أنوثتها؟؟ أختي المتزوجة مللي يكون راجلك فالدار ما دخليييييييييش للطواليط تحت أي ظرف من الظروف حاولي تقضي حاجتك مللي يكون راجلك فالخدمة غير يدخل للدار صافي خاصو يشوفك بحال ديك الفراشة و النحلة الغزالة اللي مكتعطي غير العسل , وياااك ثم وياك تحبسك البولة و تمشي للطواليط وياااك جلسي تما حتى ينوض ينعس مولاي السلطان و تكوني قدمتي ليه جميع فروض الولاء و الطاعة و تتأكدي باللي راه فسابع نومة عاد سيري دخلي وخا تطرطق ليك النبولة كاع ماشي مشكل سيري ديري عملية و خيطيها أهون من أنك تدخلي للطواليط و الراجل فالدار هاودني منكم
ثالثا المراة اللي كتنوض من النعاس و شعرها مشعكك و وجهها مخربق علاااااش , قبل ما ننعس نماكي و نصاوب وجهي و شعري و ننعس على ظهري حتى للصباح ويااااك تبقاي تتقلبي فالليل لا تخسري المشطة و لا الماكياج بقاي غيييير على ظهرك الله يجعلك ما تنوضي بعظامك مدكدكين فالصباح مكيهمش غادي تولفي مع الوقت و يولي يجيك عااادي , و بداي تحققي المكانة فالليل كل ساعتين نوضي تأكدي باللي الماكياج و المشطة باقين شادين مزيان و الكحل ما داعش تحت العينين ايوا آشنو ما عرفتي الراجل يفيق فأي وقت فالليل يبغي يمشي للحمام و لا يشرب خاصو دييييييما يلقاك سانك سانك , ايوا كيف وصيتك حققي التلفون كل ساعتين يصوني ليك و مع الوقت راه غادي تولفي تقفزي راسك ما تحتاجيش الصونيت كاع هههه ههههه

اتـرك تـعـلـيـق 477 تـعـلـيـقـات

* الإسم
* البريد الألكتروني
* حقل مطلوب

البريد الالكتروني لن يتم نشره في الموقع

شروط النشر:

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة موقعي

لا تنسوا صالح دعائكن بظهر الغيب لصاحبة الوصفة على المجهود

عرض المزيد من التعليقات
رابط مختصر